Wong Banyumas Nulis Guyon Tegalan

Cekelan Tapih

Oleh: Hamidin Krazan

Kaper olih penghargaan seni sekang Walikota. wujude duit sing jumlahe lewih gede ketimbang gajih patang wulan. Sewise nyisihna sing nggo moci kambi kanca batir, lan nyaur utang. Duit sing sejuta setengah kanggo depe motor anyar. Wingi esuk Kaper njajal motore sing esih kinyis-kinyis. Wujude ireng mbesenges. Stater lan gasse otomatis lan praktis. Tarikane mecolot kaya kodok kaget. Niate kaper muter-muter maring pasar kaget sing saben Minggu esuk tumplek blek neng platarane balai kota lawas. karepe Kaper ajek bojo lan anak wadone sing umure nembe limang tahun. Lagi lucu-lucune.

"Wis lah rika bae karo karo walad, aku ora usah melu," omonge bojone Kaper

"Sih bisane?" kaper gumun.

"Kumbahane esih ankeh, wis dikum kawit wingi mbokan mambu culeng,"

"La ko pan pesen apa?" takone Kaper

"Tukok kupat glabed bae nggo de pangan bar ngumbahi,"

"Wis? Mung kue thok?"

"Ya karo ngati-ati nggone mboncengna anak, mbok ngantuk utawa cekelane ucul," pesene bojone Kaper. Anak sing maune diemban deweke banjur dejagongna ning mburine Kaper.

"Tangane cekelan sing kenceng ya?" Welinge bojone Kaper karo tangane nglapetna tengan anake maring wetenge Kaper.

"Cekelan sing kenceng ya," bojone Kaper ngemutna maning.

"Aja watir jo, wis aku kepi tangan tengene kyeh karo lengene inyong," omonge Kaper. Bojone Kaper esih ngadeg ning jejere motor, sewaktu kaper nyatater motor. Sewaktu Kaper narik gas, bojone kaper ngemutna maning maring anake.

"Cekelan sing kencneg banget,"

Sewektu sikil kiwane Kaper ngidek gigi kambil narik gas, motote langsung mlesat. ora kelingan kue motor anyar, tarikan gasse ora usah gede-gede. Akhir motor mlayu madan kenceng. Untunge tangan tengen anake cekelan kenceng. Tapi begitu motore mlayu, bojone Kaper gomboran njaluk tulung. Jebule, tangan kiri anakke cekelan kenceng uga maring tumpal tapihe biyunge. Untunge anake Kaper ora tiba, siale bojone Kaper ora ngganggo dobelan nHamidin Karzan

Ora Mutah

Oleh: Hamidin Krazan

JAYÉNG ésuk-ésuk gipyak maring omahé Kapér. Tapiné bojoné Kapér kayong arep lunga. Tangan kiwané nyekel bungkusan plastik ireng.

"Kapér laka? Sih lagi ning endhi?"

"Déwéké wis kumpul ning omahé Kang Dasmad. Arep pada mangkat maring Solo,"

"Ana apa jané?"

"Kowén beléh ngerti sih? Pentas seni ooh,"

"Ya, uwis. Méné kuwé barang sing ketinggalan yanu baén sing ngewéhna, sekaliyan yanu arep ketemu," omongé Jayéng ngiras-ngirus.

Gutul ning omahé Kang Dasmad, Jayéng maido maring Kaper. Jalalaran déwéké ora déméhi ngerti. Kaper karo seniman Tegal arep padha péntas ning Taman Budaya Solo.

"Bisané kowen ora awéh kabar maring yanu?"

"Mulané baca Nirmalapost, ébén ora ketinggalan berita lokal,"

"Sik, ah! Kiye ana titipané bojoné kowen,"

"Apa maning kiyé?"

"Batu charger hapé karo platik kresek nggo ngadangi utahan angger mabok!"

"Raimu...." Kapér kayong madan clingukan.

"Yanu mung nyampékna pesené bojoné kowen,"

"Ya wis. Okém!"

Sebaliké sing Solo, Kaper nyangking plastik krésék ireng. Isiné mandan mbendil kayong kebek. Bojoné Kapér digawé penasaran.

"Primén ning mobil? Aman oh, ya?"

"Iya, tumbén-tumbéné inyong ora mabok ..."

"Lha plastik ireng kuwé isiné apa? Jajan kanggo walad?" ujaré bojoné Kapér kambi nyawél plastik ireng sing dicangking Kapér.

"Kiye underwear-e inyong Bu,"

"Bisané?"

"Ning perjalanan inyong ora mutah tapi wetengé mules-mules nganti kapichirit...!" *

Nunggu Jawaban

Oleh: Hamidin Krazan

WULAN September Kapér nulis és-ém-ésé maning kanggo calon wakil rakyat saka Partai Puisi. Sebabé déwéké lagi sregep namu maring kabéh sedulur sing ning Tegal. Mbuh sapaha wongé tetep dianggepé sedulur, ora mandang suku agama uga drajaté. Sebutané Sedulur ketemu gédé! Isi és-ém-ésé Kapér sing sedurungé, critané masalahé Jayéng. Jaréné, gendengé neng omahé Jayéng padha bocor. Saben udhan banyuné pating krencis mlebo maring omah, gawé teles panggonan turu, taplak meja nganti keramik umahé lunyu lan bécék. Uga ning kamaré anaké Jayéng. Akibaté saben sinau, bukuné pada teles kethétésan banyu udan sing mblodos sekang gendhéng sing padha bocor. Let seminggu, ana pikup nganter gendhéng anyar kanggo Jayéng.

Sewisé gendhéng anyar mau diterapna kabeh, saben ana udan umahé Jayéng ora teles kejebes maning.

Akhir Wulan Nopembér, si calon législatif nelpon maring Kapér. Déwéké takon kahanan umahé Jayéng.

"Pimén, seuwisé umahé Jayéng déganti gendhéngé?"

"Pokoké bérés boss. Tapiné saiki Jayéng saben mbengi mbatiri anaké sinau ning sekolahan," jawabé Kapér.

"Sih bisané, ora sinau ning omah? Pan saben udan wis ora bocor oya?"

"Udhana gedhé gendhéngé uwis rapet, tepiné banyu udan sekang sawah padha mlebu kabéh maring umah. Anjog maring ruang tamu, dapur lan kamar turu. Jeroné banyu nganthi senduwuré lututé Jayéng. Saiki saben wengi Jayeng karo keluargané padha ngungsi ning sekolahan...."

"Désané Jayéng kebanjiran?!"

"Yaul! Mbanjur kepribén agéndané sampéyan?" takoné Kapér semangat. Sebabé dewéké ngarep-arep sripilané maning.

Tut... tut.... tut.... Ujug-ujug sambungan telphoné putus.

"Aloo... Alooo....!! Kapér gemboran. Tetep ora ana jawaban.

"Nabi Nuh sing dadi wakilé Gusti Allah baé ora bisa mbendung banjir, apa maning sing némbé calon wakilé rakyat..." Kaper ngegrundel *